250 nenas e nenos participaron na campaña “Cores para a esclerose” de ACEM con motivo do vindeiro Día Mundial da Esclerose Múltiple

By acem Uncategorized @gl 0 Comments

A campaña desenvolveuse durante un mes con motivo do vindeiro Día Mundial da Esclerose múltiple (30 de maio de 2021), contou coa colaboración dos Concellos de Santiago, Ames, Teo, Brión e Oroso e da empresa Alcampo.
ACEM obtivo o respaldo da comunidade educativa, recibindo 250 debuxos.
Os debuxos gañadores do concurso pertencen a alumnado de CEIP Agro do Muiño de Ames, do CRA de Oroso e do CPR La milagrosa de Santiago.
Os doce debuxos finalistas formarán parte dun calendario solidario e todos os debuxos forman parte xa dunha exposición en ACEM.
Os cinco concellos colaboradores alumearan as fachadas de distintas cores este domingo, Día Mundial da Esclerose Múltiple, con motivo da campaña Cores para a Esclerose.

Este xoves ás 17hrs. tivo lugar na Asociación Compostelá de Esclerose Múltiple (ACEM) o acto de peche da campaña “Cores para a esclerose”, unha campaña de concienciación, divulgación e visibilización da enfermidade nos centros de educación primaria de Santiago e a súa contorna, que ACEM levou a cabo durante este mes con motivo do vindeiro Día Mundial da Esclerose Múltiple (30 de maio de 2021).

A campaña “Cores para a esclerose” concretouse nunha presentación didáctica na aula e nun concurso de debuxo no que puido participar o alumnado de primaria dos centros educativos que se adheriron á campaña.

O acto de peche da campaña abriuno a presidenta de ACEM, Mª Teresa González Salvadores, que lembrou os obxectivos de visibilizar a enfermidade entre o alumnado e traballar na educación primaria valores como a empatía, a inclusión a diversidade e a solidariedade. Teresa González destacou a extraordinaria participación na campaña por parte dos centros educativos, ao recibir 250 debuxos de centros educativos de todos os concellos implicados: Santiago, Ames, Oroso, Teo e Brión.

A presidenta de ACEM quixo agradecer o compromiso dos centros educativos que fixeron o esforzo de incluir esta actividade na súa axenda para sumarse á campaña Cores para a esclerose: o CEIP Pío XII e o CPR La Milagrosa de Santiago, o CEIP do Camiño Inglés, o CEIP de Sigueiro e o CRA de Oroso; o CEIP Agro do Muiño de Ames; o CRA de Teo, e o CEIP de Pedrouzos.

No acto de peche desta campaña e entrega de premios do concurso de debuxo participaron tamén os concelleiros de Políticas e Servizos Sociais de case todos os concellos colaboradores: Luisa Feijoó edil de Ames, Ignacio Iglesias de Teo, Isabel Fernández de Oroso e María Rosa Romero de Brión.

Tampouco quixo faltar a cita Juan Rodríguez Castro, o director do hipermercado Alcampo de Santiago, empresa colaboradora da campaña que quixo sumarse á mesma contribuindo cos premios do concurso de debuxo.

Juan Rodríguez Castro, director do Hipermercado Alcampo Santiago, coas nenos e a nena premiados

O premio para cada unha das categorías consistiu nun lote composto por unha tablet cortesía da empresa Alcampo, un libro, unha bolsa de tea e unha pulseira solidaria da Asociación, lapis externo, e material escolar.

Entrega de premios

Persoas afectadas pola enfermidade socias de ACEM foron as encargadas de facer a entrega de premios ás autoras e ao autor dos debuxos premiados.

A gañadora na categoría A (1º e 2º de primaria) foi Sofía Viqueira Rey do CRA de Oroso (Oroso) que recibiu o premio das mans de Tomás Díaz, acompañada do mestre Javier Rivas.

Sofía Viqueira recebe o premio ao mellor debuxo na categoría A

A gañadora na categoría B (3º e 4º de primaria) foi Elsa Villanueva Giao, do CEIP Agro do Muiño (Ames), que recolleu a premio das mans de Vicente Pose, acompañada pola directora do colexio Mari Carmen Liñares.

Elsa Villanueva recebe o premio ao mellor debuxo na categoría B

O gañador na Categoría C (5º e 6º de primaria) foi Pablo Castro Bueno do CPR La Milagrosa (Santiago), que recolleu o premio acompañado do director do colexio Luis das mans de Teresa González, afectada e presidenta de ACEM.