Fisioterapia

O servizo de fisioterapia é un pilar fundamental do noso Centro de Rehabilitación Integral. Fai especial fincapé na prevención, prognóstico e tratamento dos déficits presentados nas persoas afectadas de esclerose múltiple, párkinson e ELA como resultado do padecemento das súas enfermidades.

A rehabilitación fisioterapéutica ten como finalidade abordar de xeito integral os síntomas físicos que sofren as persoas afectadas. Con esta intervención lógrase manter no tempo altos niveis de funcionalidade e autonomía persoal, ó tempo que se prevén dun deterioro prematuro por causa da patoloxía diagnosticada, logrando así contribuír coa mellora da calidade de vida das persoas afectadas.

Os obxectivos propostos céntranse na diminución da dor, na regulación do ton muscular, na reeducación da marcha, e na mellora da sensibilidade, da mobilidade, da forza, do control postural, do equilibrio, da coordinación, da resistencia á fatiga, da autonomía e da motricidade fina e grosa, entre outros.

Algunhas das accións que se inclúen dentro do programa son:

• Valoración individualizada de cada paciente, e deseño personalizado do plan de rehabilitación.
• Execución e revisión continua do plan de rehabilitación, adaptándoo segundo a evolución da patoloxía e/ou outros factores (ambientais, sociais, familiares….) que poidan repercutir sobre o estado de saúde e a funcionalidade.
• Formación para a saúde, con orientacións tanto para as persoas doentes como para as súas familias e outras persoas do entorno máis inmediato, incidindo na importancia de manter un papel activo.